apni marzi se kahaan apne safar ke hum hain

apni marzi se kahaan apne safar ke hum hain
rukh hawaaon ka jidhar ka hai udhar ke hum hain

pehle har cheez thi apni magar abb lagtaa hai
apne hi ghar mei kisi doosre ghar ke hum hain

waqt ke saath hai mitti ka safar sadiyon tak
kisko maaloom kahaan ke hain kidhar ke hum hain

chalte rehte hain ki chalna hai musafir ka naseeb
sochte rehte hain ki kis rehguzar ke hum hain

gintiyo mei hi giney jaate hain har daur mei hum
har kalamkaar ki benaam khabar ke hum hain

~ Nida Fazli

dhoop mei niklo ghatao mei nahaa kar dekho

dhoop mei niklo ghatao mei nahaa kar dekho
zindagi kya hai kitaabo ko hataa kar dekho

wo sitara hai chamakne do yuhi aankho mei
kya zaroori hai usse jism banaa kar dekho

pattharo mei bhi zubaa hoti hai, dil hotey hain
apne ghar ki dar-o-deewar sajaa kar dekho

faasla nazaro ka dhoka bhii to ho sakta hai
wo miley ya na miley haath badhaa kar dekho

~ Nida Fazli

ab khushi hai na koi gham rulaane wala

ab khushi hai na koi gham rulaane wala
humne apnaa liya har rang zamaane wala

usko rukhsat to kiya tha, mujhe maaloom na tha
sara ghar le gaya, ghar chhod ke jaane wala

ik musaafir ke safar jaisi hai sab ki duniya
koi jaldi mei, koi derr se jaane wala

ek be-chehra si umeed hai chehra-chehra
jis taraf dekhiye aane ko hai aane wala

~ Nida Fazli

jab kisi se koi gila rakhna

jab kisi se koi gila rakhna
samne apne ainaa rakhna

yu ujaalo se vaasta rakhna
shama ke paas hi hava rakhna

ghar ki taamir chaahe jaisi ho
issme rone ki jagah rakhna

masjidey hai namaziyo ke liye
apne ghar mei kahin khuda rakhna

milna-julna jahaan zaroori ho
milne-julne ka hausla rakhna

~ Nida Fazli