aarzoo hai wafaa kare koi

aarzoo hai wafaa kare koi
jee na chaahe to kya kare koi

gar marz ho dawaa kare koi
marne waale ka kya kare koi

koste hain jaley huye kya kya
apne haq mei duaa kare koi

unse sab apni-apni kehte hain
mera matlab adaa kare koi

tum saraapa ho soorat-e-tasveer
tum se phir baat kya kare koi

jisme laakho baras ki hoore ho
aisi jannat ka kya kare koi

~ Daag Dehlvi

har khushi mei koi kami si hai

har khushi mei koi kami si hai
hansti aankho mei bhi nami si hai

din bhi chup-chap sar jhukaye tha
raat ki nafz bhi thami si hai

khwab tha ya gubaar tha koi
gard in palko pe jami si hai

kah gaye hum kisse dil ki baat
shehar mei ek sansani si hai

hasratein raakh ho gayi lekin
aag ab bhi kahin dabi si hai

~ Javed Akhtar

wo dil hi kya tere milane ki jo dua na kare

wo dil hi kya tere milane ki jo dua na kare
mai tujhko bhool ke zinda rahoo, khuda na kare

rahega saath tera pyaar zindagi bankar
ye aur baat, meri zindagi wafa na kare

ye theek hai, nahi marta koi judaai mei
khuda kisi se kisi ko magar juda na kare

suna hai usko mohabbat duaaye deti hai
jo dil pe chot to khaaye magar gila na kare

zamana dekh chuka hai, parakh chuka hai use
"Qateel" jaan se jaaye par iltaja na kare

~ Qateel Shifai

kabhi aah lab pe machal gayi, kabhi ashk ankh se dhal gaye

kabhi aah lab pe machal gayi, kabhi ashk ankh se dhal gaye
wo tumhare gham ke chiraag hain, kabhii bujh gaye kabhi jal gaye

mai khayal-o-khwab ki mehfile na baqadr-e-shauq sajaa saka
tumhari ik nazar ke saath hi mere sab iraade badal gaye

kabhi rang mei kabhi roop mei, kabhi chhaav mei kabhi dhoop mei
kahin aftaab-e-nazar hain wo, kahin mahtaab mei dhal gaye

jo fanaa huye gham-e-ishq mei, unhe zindagi ka na gam hua
jo na apni aag mei jal sake wo paraayi aag mei jal gaye

ya unhe bhi meri tarah junoon to phir un mei mujh mei ye farq kya
mai giraft-e-gham se na bach saka, wo hudood-e-gam se nikal gaye

~ Rashid Kamil

zindagi yu huyi basar tanha

zindagi yu huyi basar tanha
kaafila saath aur safar tanha

apne saaye se chaunk jaate hain 
umr guzri hai is qadar tanhaa 

raat bhar bolte hain sannaate
raat kaate koi kidhar tanha

din guzarta nahi hai logo mei
raat hoti nahi basar tanha 

humne darwaze tak to dekha tha
phir na jaane gaye kidhar tanha

~ Gulzar

tumhare shehar ka mausam bada suhana lage

tumhare shehar ka mausam bada suhana lage 
mai ek sham chura loon agar bura na lage 

tumhare bas mei agar ho to bhool jao hume 
tumhe bhoolne mei shayad mujhe zamana lage 

hamare pyar se jalne lagi hai ye duniya 
dua karo kisi dushman ki bad-dua na lage 

na jaane kya hai uski bebaak aankho mei 
vo mooh chhupa ke jaaye bhi to bewafa na lage 

jo doobna hai to itne sukoon se dubo 
ke aas-paas ki leharon ko bhi pata na lage 

ho jis ada se mere saath bewafayi kar 
ke tere baad mujhe koi bewafaa na lage 

wo phool jo mere daaman se ho gaye mansoob 
khudaa kare unhe bazaar ki hawa na lage 

tum aankh moond ke pi jao zindagi 'Qaiser' 
ke ek ghoont mei shayad ye bad-maza na lage

~ Qaiser ul Jafri

mujhse mera kya rishta hai, har ek rishta bhool gaya

mujhse mera kya rishta hai, har ek rishta bhool gaya 
itne aaine dekhe hain, apna chehra bhool gaya 

ab to ye bhi yaad nahi hai farq tha kitna dono mei 
uski baatein yaad rahi aur uska lehja bhool gaya 

pyasi dharti ke hotho par mera naam nahi to kya 
mai vo baadal ka tukda hoon jisko dariya bhool gaya 

duniya wale kuch bhi kahey "Raashid" apni majboori hai 
uski gali jab yaad aayi hai, ghar ka rasta bhool gaya

~ Mumtaz Rashid

dono jahan teri mohabbat mei haar ke

dono jahan teri mohabbat mei haar ke
wo ja raha hai koi shab-e-gham guzaar ke

veeraan hai maikada, khum-o-sagar udaas hai
tum kya gaye ki rooth gaye din bahaar ke

ik fursat-e-gunaah mili, wo bhi chaar din
dekhe hain humne hausley parvar-digaar ke

duniya ne teri yaad se begana kar diya
tujh se bhi dil fareb hain gham rozgaar ke

bhoole se muskuraa to diye the wo aaj 'Faiz'
mat poochh val-valey dil-e-na-kardakaar ke

~ Faiz Ahmed Faiz

ab khushi hai na koi gham rulaane wala

ab khushi hai na koi gham rulaane wala
humne apnaa liya har rang zamaane wala

usko rukhsat to kiya tha, mujhe maaloom na tha
sara ghar le gaya, ghar chhod ke jaane wala

ik musaafir ke safar jaisi hai sab ki duniya
koi jaldi mei, koi derr se jaane wala

ek be-chehra si umeed hai chehra-chehra
jis taraf dekhiye aane ko hai aane wala

~ Nida Fazli

dard ke phool bhi khilte hain bikhar jaate hain

dard ke phool bhi khilte hain bikhar jaate hain
zakhm kaise bhi ho, kuch roz mei bhar jaate hain

us dareeche mei bhi ab koi nahi aur ham bhi
sar jhukaye huye chup-chaap guzar jaate hain

raastaa roke khadi hai yahi uljhan kab se
koi poochhe to kahe kya ki kidhar jaate hain

narm awaz bhali baatein mohazzab lehje
pehli baarish mei hi ye rang utar jaate hain

~ Javed Akhtar

tera khayaal dil se mitaya nahi abhi

tera khayaal dil se mitaya nahi abhi
bedard maine tujhko bhulaya nahi abhi

kal tuney muskura ke jalaya tha khud jise
seene mei wo charaag bujhaya nahi abhi

gardan ko aaj bhi tere baahon ki yaad hai
chaukhat se teri, sar ko uthaya nahi abhi

behosh hoke jald tujhe hosh aa gaya
mai badanasiib hosh mei aya nahi abhi

~ Sahir Ludhianvi